افكار جميلة نبتدي بيها اول يوم رمضان خصوصا ل اخواتي و صديقاتي

18 يونيو

10437792_1512620045658029_6369227588741044311_n

افكار جميلة نبتدي بيها اول يوم رمضان خصوصا ل اخواتي و صديقاتي
أعمال خيرية سهلة وجميلة من افكار بنات و سيدات حلوة زيكم تحياتي بتول

ماشاءالله علي الناس اللي دايما فكرها مرتبط بربنا وبآخرتها ربنا يرزقنا كما رزقهم من فضله .. ناس حلوة قووووي يارب ارزقنا من فضلك العظيم

🌹بنوته قالت فكره يمكن لم تخطر ببالي أبدا .. قالت اتعودو وعودو اولادكم زي ما ييجيلنا ضيوف فننضف البيت ونعطره .. مش هنستقبل اغلى من ضيوف الله .. الملائكة ..
قبل كل صلاة نظفو الغرفه اللي هتصلو فيها وعطروها لتليق باستقبال الملائكة .. عطرو اسدال الصلاة والسجاده لإن لما بنقابل حد غالي علينا بنتعطر ونتطيب ومش هنقف بين إيدين حد أجل وأعز من ملك الملوك سبحانه وتعالى

🌹بنوته تانيه قالت .. لو مش عارفه تتصدقي بنفسك طلعي كل يوم على شباك المطبخ او حرف البلكونه كبشة رز وكوباية ميه للحمام والعصافير واحتسبيها صدقة لله
وبواقي اكلك جمعيها كل تلات ايام نزليها ف كيس لوحدها حطيه مفتوح في المكان اللي بتكون فيه القطط واحتسبيه صدقه لله

🌹بنوته تالته قالت .. لمي اسدالات الصلاة اللي ف المسجد اغسليهم واكويهم وعطريهم ورجعيهم الصبح وانويها لله ..

🌹ورابعة قالت .. علمي اي طفل يقابلك سورة من قصار السور وياحبذا الفاتحة عشان يقرأ بيها طول حياته .. وخلي معاكي اكسسوارات وحلويات ف شنطتك للاطفال اللي بتقف ع الاشارات هيفرحو بيها جدا غير الفلوس لإن ممكن مش بيشتروها لنفسهم ..

🌹وخامسة قالت .. هاتي كيس وحطي فيه اي شيء من البيت .. برتقاله .. عصير .. تلات تمرات .. بسكويت .. ازازة مية صغيره .. خليهم ف التلاجه وخديهم قبل ماتنزلي من البيت واديهم ف الحر الشديد ده لأي عامل من الغلابا اللي ماليين الشوارع واحتسبيها لله انه يصرف عنك حر يوم القيامة ..
وياسلام لو حطيتيها ف كيس هدايا جميل وصغير مش كيس بلاستيك هاتيهم بالجمله .. وانوي انه ينتفع بيها يمكن غلبان يبعت فيها حاجه لزوجته وتكون ف كيس حلو وانوي ادخال السرور عليه مرتين ..

🌹طلعي اي فلوس زياده لعامل البنزين لعامل السوبرماركت لطفل سايق بيكي التوكتوك ولو جنيه واحد لعامل النظافه لأي حد من اللي مرتباتهم ضعيفه وياسلام لو تكون فلوس الفكة اللي ناويه تطلعيها لله معطرة عشان بتقع في يد الله قبل ما تقع في يد الفقير ..

🌹سادسة قالت .. لما تيجي تطلعي ملابس للصدقه .. اختاري النظيف وطلعي معاها شيء واحد ع الاقل عزيز عليكي جدا لن تنالوا البر حتى تنفقوا مما تحبون .. اغسليهم وعطريهم ولو كانت ملابس اطفال بالذات حطي في جيوبها جنيهين فضه .. مصاصه .. بونبوني .. لو كانت اعزكم الله أحذيه حطي جواها شراب جديد واحتسبيها ادخال سرور على قلب مسلم ..

🌹سابعة قالت .. اسألي البقال او الصيدلي بس يكون أمين .. عن اللي ليهم حساب عنده متأخر ومستحقين للمساعده وادفعي عنهم بظهر الغيب .. وخدي الأدوية اللي ماليه بيتك ولسا صلاحيتها شغاله ونزليها للصيدلي الأمين يديهم للي محتاجهم حصوصا لو ادويه ناقصه في السوق او غاليه بس باقيه عندك

🌹ثامنة قالت .. اقرضي الله قرضا حسنا .. اللي يجيلك يطلب منك سلف وف مقدرتك سلفيهم وفي نيتك انك مش هتاخديها منهم ولو جت ترد السلف قوليلها بلطف انه هديه منك واحتسبيها لله انك وفرتي عليها احراج كبير واخدت فلوس بس بعزة نفس ..

🌹تاسعة قالت .. لا تمنعي الماعون .. اللي تطلب منك شيء للبيت اديها حتى لو تأخر عندها .. شوفي ست كبيرة وحيده سلمي عليها واقعدي معاها ونظفي لها البيت واحتسبيها لله..

🌹عاشرة قالت .. للي هيتأخرو بعد صلاة التراويح .. خدي معاكي مناديل للمسجد .. نظفي المسجد بعد ما الناس تمشي .. ساوي الصفوف.. خدي معاكي الوان وكراريس تلوين للاطفال اللي بيزعجو الناس عشان يتلهو فيها ويحبو المسجد .. خدي معاكي بخاخ معطر او فواحه او بخور وطيبي المسجد او السجاد . اللي هيسجد وتنشرح نفسه هيدعيلك .. شجعي اي شيخ صغير السن يعمل حلقة للاطفال في رمضان واعمليله راتب واحتسبيه لله وشوفي هتاخدي ثواب كم طفل وكم آية ..

🌹اخرى قالت .. مع خزين الشهر اشتري من كل شيء حاجه و احده بس زياده .. شوية زيت شوية رز شوية سكر كيلو من كل حاجه .. علبة فول .. كيس شوكولاته وحطيهم ف كرتونه صغيره و ادخلي بيها السرور على اسره محتاجه .. هتستصغريها بس يعلم الله ممكن متفرقش عندك انتي خااص لكن تفرق عندهم كتير..

🌹اقل الصدقة .. ابتسمي
🌹 ألقي السلام على من عرفت ومن لم تعرفي ..
🌹تصدقي بالكلمة الطيبه ..
🌹بجبر الخاطر ..
🌹بكلمة حلوة لأختك لو لابسه حاجه جديده وجميله امدحيها وادعيلها بالبركه وفرحيها ..
🌹لو كتبت خاطرة امدحيها واسعديها وادعيلها
🌹امسحي على شعر يتيم ..
🌹ادعي لعاصيه شفتيها ماشيه ف الشارع بدل ما للاسف اتعودنا ندعي عليهم من شدة تبرجهم..
🌹ممكن مش كل الناس تقدر تتصدق بالمال تصدقي بالدعاء للمسلمين احيائهم وامواتهم ..
🌹تصدقي بركعتين في الليل تدعي فيهم لاخوتنا المكروبين
🌹تصدقي بركعتين بعد كل وضوء كعمل سيدنا بلال
🌹تصدقي بالذكر طول مانتي ساكته
🌹تصدقي بتشغيل صوت القران في البيت ليسمعه الجيران من بعيد بدون ازعاج طبعا ..
🌹تصدقي بتجديد النية قبل نشر اي شيء ع الفيس بوك عشان يكون لك صدقة جاريه ..
حتى لو حاجة تضحك انوي ادخال السرور على قلوب اخواتك يمكن تضحكي اختك وهي ف عز همها ..
حتى لو وصفه طبيخ انوي تعليم ماعلمك الله وان لو اختك عملته لولادها وزوجها وادخلت عليهم السرور يكون في ميزانك ..

🌹تصدقي بالدعاء لحبايبك بظهر الغيب من غير ما تقوليلهم وانتي صايمه وبتفطري او في اوقات تحري اجابة الدعاء

🌹تصدقي بكظم الغيظ وكف الأذى لما تزعلي من حد .. ممكن ما ترديش خالص ..واختيار الكلمة التي هي احسن خصوصا ع الفيس بوك بنرد ردود صعبه وقاسيه جدا ونتدخل ف اشياء لا تعنينا وممكن بكلمة واحده نسبب ضيق شديد جدا لانسانه منعرفهاش وممكن بكلمة طيبه تبات سعيده ونفسيتها حلوة ..

🌹تصدقي بنشر اذكار مش معروفه قوي
🌹تصدقي بركعتي الضحى

ربنا يكرمني وإياكم باعمال صالحة لا يعلمها إلا الله تكون نجاة لنا يوم القيامة وسببا لحسن الخاتمة

اميـــــــــ♥ــــــــرة الزهور بتــــــــ♥ــــــول 

💕 أجمل القلوب من أحبت الخير لغيرها مثلما أحبته لنفسهـا♥ اميرة الزهور بتول 💕

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: